nitinvanmana

Dec 1, Nitin Van Mana Ezekiel 40-41, 2Peter 3 Ezekiel 40:3 Dar vekih a tleumi mipa pakhat in tahnak lazai hri le tahnak fung a kengih kotka ih a din kha ka hmu. Ezekiel in langnak a hmuhmi ah pakhatpa in biakinn kha tahfung in a tah ciamco. Cui' tahfung le tahnak hri cu Pathian ih lungkimmi le a duhnak vek ciah ih hmanmi asi. Tusun ah kanmah le kan biakinn cio ah "Sweet December" kan lawmih lungawi le aipuang in kan puai tluttlo rero. Dec 25 a thleng dingih Khrismat puai kan hmang dutdo lala ding. Kan ruat dah ngelcel maw cu thei hlah; milai lam cun hlim le nuam in caan kan hmang rero nan kan biakinn le kan kawhhran cangvaih daan pawl hi Pathian ih tahfung in tah asi tikah ziang a bang pei? December a thleng thlangih Khrih suahcam asi ruangah lungawi a um zet vekin khatlam ah ttih tla a nung. Zumtu pawl kan ralrin a ttul ngaingai. "Zovek khalin an duhdaan in Khrismat puai an lawm cio ding. Asinan nang cu Pathian ih tahfung lengah lorfuan pang hlah!" # Zumtu tampi in Khrih suahcam kan lawm kan tiih kanmah le kanmah asilole mi fanu le fapa siatsuahnak ah kan hmang cu a poi thei tuk. Bawipa a riahsia tuk ding. 2 Pet 3:14 Curuangah ka duhdawtmi tla, cui' Ni (Thutthennak Ni) nan hngak lai ah hin Pathian hmaiah mawh neilo le a thiangmi si dingah zuam uhla amah thawn remaw mi si uh. Thianhlimnak nun hi zumlotu pawl hrangah asilo, zumtu pawl hrangah asi. Zumtu pawl cu Pathian hmai le minunag hmaiah thianghlim zet le zohmawi zetih nung ding kan si. "Zumtu na si ahcun leitlun sualnak thawi' hnawihnih aw ringring ding na si hrimhrim lo. Nun thianghlim nei in thlarau lamah tthanglian sinsin ding na si sawn." # Curuangah ralring zetin nung uh! Cin le daan neilomi pawlin an lo hruaisual lonak dingah le him zetin nan umnak hmun ihsin nan tlaklonak dingah ralringte'n um uh. (2 Pet 3:17) # Kan Bawipa le in Runtu Jesuh Khrih zangfah lainatnak le amah theihnak sungah tthang vivo uh. (2 Pet 3:18) Pathian thlawsuahnak ..... na hnen um hram seh!!! Salai Vanruah.