Thusimtu bung 7 Fimnak Ih Thupitnak

                                   Thusimtu 7                               Fimnak Ih Thupitnak ¹ Hminṭhat cu zihmui ṭhabik hnakin a ṭha sawn. Thih ni cu suah ni hnakin a ṭha sawn.

² Puai tuahnak hmunih feh hnakin mithi inn feh a ṭha sawn. Ziangah tile minung cu kan zate in thihnak in in hngak a si ti cu theih ringring ding a si.

³ Hnih hnakin riahsiat a ṭha sawn. Mithmai ah lungawinak a um theilo nain thinlung a ṭhat ter.

⁴ Mifim pawlih thinlung cu mithi inn ah a caam; a sinan mi aa pawlih thinlung cu nomnak hmunah a um.

⁵ Mi aa ih na thangṭhatnak hla a sak mi ngai hnakin mifim ih kawknak ngai a ṭha sawn.

⁶ Mi aa hnih cu meisa sungih hling an pa ih ih a puak mi thawm vek a si. Tican ziang hman a nei lo.

⁷ Mifim in midang a bum tikah mi aa ah a can aw a si. Nawhthuh na lak a sile na ziaza na siatsuah a si.

⁸ Thil thokpek hnakin a net lam a ṭha sawn. Hngalzet ih um hnak cun lungsau a ṭha sawn.

⁹ Olte in na thinheng hlah; olte-ih thinheng cu mi aa pawlih daan a si. 

¹⁰ “Ziangtin so tuihsan hnakin hlan san a ṭhat sawn?” tiah va sut hlah. Cuvek cu mifim pawl thusuh daan a si lo.

¹¹ Thilri neih hnakin fimnak neih a ṭha sawn. Ni a hmutu hmuahhmuah hrangah a ṭha mi ro a si. 

¹² Fimnak cu sumsaw vekin humhimnak a si; fimnak cun fimnak neitu hnenah nunnak a pek a si.

¹³ Pathian ih hnaṭuannak hi ruat hnik uh: A kawihter cia mi hi zoso a dingter thei ding? 

¹⁴ Ṭhat ni ah na lungawi aw; siat ni ah khua ruat aw. Pathian in lungawinak a um ter ih harnak khal a um ter. Curuangah hmailam ah ziang a um ding ti cu zohman in an thei lo.

¹⁵ Ka nunnak santlailo sungah hin thil phunkim ka hmu ih mawh neilo cu mawh a neilo nain a thi lohli ih miṭha lo cu a ṭhatlonak thawn kum reipi a nung mi ka hmu. 

¹⁶ Miṭha tuk si aw hlah, mifim tuk khal si aw hlah, ziangah so nangmah le nangmah na siatsuah awk ding. 

¹⁷ Miṭha lo tuk va si hlah; mi aa tuk khal va si hlah. Na tikcu kim hlanah ziangah so na thih ding?

 ¹⁸ Thil pakhat fekten kai ih a dang thil khal thlah cuanglo a ṭha. Pathian a ṭihzah tu cun a phunhnih ah an hlawh a tling ding.

¹⁹ Khua hotu upa pahra in khua hnenih cahnak an pek mi hnakin fimnak in mifim pa hnenah cahnak tam sawn a pek.

²⁰ Leilung tlunah ṭhatnak lawnglawng a tuah ih siatnak a tuah dah lotu zohman an um lo.

²¹ Cui tlunah mi ṭongmi hmuahhmuah cu va poisa tuk hlah; culo ahcun na hnen-um pawl khalin an lo relsiatnak na thei pang ding. 

²² Nangmah khalin midang vei tampi na relsiat ti na thei aw ko.

²³ Hi hmuahhmuah hi fimnak in ka hniksak. Ka fim hmang tin ka ruat, a sinan ka rak fim ta lo. 

²⁴ Nunnak timi hi zoso a thei thei ding? A hlazet le a thuk zet, a thuk taktak mi a si ih zohman ih hawlsuak theih ding a si lo. 

²⁵ Curuangah ka thinlung cu fimnak hawl ding le zir ding le hmu suak dingin ka vun ruat ciammam ih ka ton ngaingai mi cu ṭhatlonak le fimlonak le aatnak le buainak lawng an si.

²⁶ Nunau ka ton mi cu ka hrangah thihnak hnakin a khaa sawn, a thinlung cu thang a si ih a kut pawl cu thir cikcin an si; Pathian ih zaangfah mi cu cunu hnenin a luat ding, a sinan misual cu cunu in a kaitaar ding. 

²⁷ Thusimtu in, “Ka hmuh mi cu himi hi a si: thil pakhat hnu pakhat ka thinlung in ka ngaihtuah vivo; a thusuak ka hawl vivo; ²⁸ reipi ka hawl nain ka hlawhtling lo a si. Cule minung thawngkhat sungah upat tlak cu mipa pakhat ka hmu; a sinan nunau cu pakhat hman ka hmu lo. 

²⁹ Ngaihnik, ka hmuh mi cu himi hi a si: Pathian in minung hi miding ah a tuah nain anmah duhnak le tumtahnak ah an pial ṭheh a si,” a ti.