Sam 23:2 Tlimnolakah i bawh ter....

Psalms 23:2, " Tlimno lakah i bawh ter ih a thiangmi tiva kiang ah i hruai." 1. Tlimno lak ah I bawh ter ( He makes me lie down in green pasture ) " I bawh ter," ti mi cahlawm hi Tuu khal tu in Tuu kha Bawk ding ih thupek asi. Palestinian world hi nelrawn tam sawn a si ruang ah kan ramvek in hrampi hmuntinah a keuh ve lo. Keuhnak hmun deuhdeuh hi a um. Tuu khaal tu cun Tuu a khalh tikah hrampi tthatnak hmun ah cun a hruai theu. Cucun Kan nih zumtu Pathianfale tla hi, in khaal tu Bawipa hin kan nun ih diriamnak, Puratlainak le nun tthanlen/ hriselnak ding hmun hlir ah in hruai, in center ti mi a sim duh. Asinan Tuu hin cui hrampi no zet zet cu a hnah lawng ei cu diriamtawk lo in a hram phong tiang in an piat ciamco ttheu. Cui Tuu cun nangmah le kei mah si a khihhmuh. Ngah zatzat le neihzatzat khal ih diriam lunghmui duhtawk ti nei dah lo. Van malsawm khal a hram tiang phong vohvo ih ei duh/ coduh/ ngahduh, miduhaam kan si nak hi in hmuhsak. Cu le ve ten Tuu khaaltu in, " A tawk, Bawk," ti ah einawnlo ding in thu ape. Nang le kei khal kan neihsun ngahsun mi malsawmnak parih diriam ding hi kan Bawipa, in khaaltu in in zirh. ( Heb. 13:5 ) 2. A thiangmi tiva kiang ah i hruai ( He leads me beside quiet water ) ( Eph. 5:26 ) Tuu cun tidai rim a thei thei lo, a hmailam hlapi khal a hmu thei lo. Cu cu nang mah le kei mah ciah hi in hmuhsak. Hruaitu Bawipa ( Or Bible ) ih in hruailo cun kan mah ten diriamzet le hnukciap zet ih kannun infansuak tu vanlam thutak hi vawitampi kan thei thei lo theu. Kan hrang ih ttha le Nunnak ding zin khal hi kan hmuthei theu lo. Curuangah sualruang ih diriam dah lo mi kan nunnak cu hnukciap diriam thlep thlep ding ah le leitaksa mit le ruahnak ih kan hmuhban thei lo mi kumkhawnunnak thutak le nitin kan nun ih ttulsam mi a thutak zin khal hi hmuthei ding ah in khaal tu Bawipa in a thutak ( Bible ) zin ih in hruai ring ring kan ttul. Kan nun ih ttulsammi hmuah hmuah in pe ( supply ) theinak ding ah Bawipa ih dung / zin ( Thutak-Bible ) kan thlun ring ring a tul. A thutak zinzawh lawng ah hin si Nun diriamnak taktak le thawsuah diktak, cu arak um. Tuisun ni ah cuinun kanneih thei nak ding ah Thiangthlarau in lam in hruai ring ring. ( Jn.7:38,39 ) Pathian in malza lo sawm vivo hram seh. Note: Ps. 23 hi a cemtiang in nganpeh vi vo lai ding. James San Thawm Thang Pastor N.Okkalar GBC Yangon